CHUNH THAH

Chunhthah hi hlanlio ahcun sungsai ngaiin le ningcang tein kan rak hman hna. Tahchunhnak ah Bawite hna ahhin Tlangzaam ah Sia, zuanchunh ah Sia, bawi reu ah Vok pahnih, chia reu ah Vok khat, thingsaah vok khat, le khuangkung ah vok tibantuk in a dang hna zong tampi a um rih. Asinain atu ahcun kha bantuk kha kan hmang ti lo. Kan phun kan Lam ti hna lo i kan hmangti hna lo. Atu i kan van langhtermi hna cu Saikah khua nih kan rak hman tawnmi chunhthah kha an si.

BAWI
Bawi hi an sunhsak ngaimi a si i mi tampi an bawi khawh lomi a si. A tlawmbik ah Sia 2 le vok 5 thah a hau. A that kho caah cun hi nak tam zong an thah ko.

SA FIM

Safim ahhin Cakei lu hi an fim tawnmi cu a si. A tlawmbik ah Sia le Vok pahnih thah a hau. Salufim hi nithum chung a si.(1) Salu laak (2) theng phah ni le (3) Laam ni hna hi an si. Laam serh ah hin Sia le Vok in serh khawh asi.

FANU AH

Fanu ah an timi cu an fanu le va an ngeih tikah sa tampi thahpiak a si ko. An hmanning cu sia pakhat hi thau nga an ti i caw pakhat hi thauthum an ti. Cuticun thaunga in a cung lei paoh kha ‘AH’ an ti i fanu va ngeih ah thau cu zat a ‘AH’ ti kha an upatmi cu a si. Cu caah a tam lei paoh in izuam a si ko.