FIMTHAM NAK

SIANG INN THAWHKEH NAK LE CACHIMTU HNA

Saikah khua hi 1830 hrawng ah rak tlak mi a si ko cang nain, a hlan ahcun Sianginn kai hi tha pek awk a si zia le a that zia hi an rak hngal lo i cozah nih khuakhat pakhat tal nan kai lai an rak ti hmanh ah a kai ding chungkhar cu an rak nehsawh/thlanglamh hna. Harsat nak phunphun an rak ton tikah fimthiam nak lei hi can an rak pe kho lo.

Sianginn kai cu hruh deuh ah an rak ruah. Cucaah can saupi chung kum 115 chung hrawng hi Sianginn nei lo in an rak um. Khua caan a hung i thlengdeuh i Upa lungfim deuh hna nih, fimthiamnak cacawnnak ngeih loin um kha a si khawh lo an vun ifiang i private primary sianginn hi dirh ah a ttha ko tiah an rak chim i mipi zong an lung a thawh ve caah 1945 ah private primary sianginn cu an rak dirh.

Hi private primary sianginn an dirh chungah hin khua chingchan zongin sianginn an rak kai len ve hna. Private primary Sianginn cu kum 13 chung an rak dirh. Hi chungah cachimtu ah an lakmi hna nih teimaak chuah in ca an rak chimh hna. Khua chel ahcun ca chimtu pakhat lawng hna nih siangngakchia an zate in a rak chimh tawn hna. Kum 13 chung i saya akan tuanpiaktu hna hi philh awk an tthat lo caah an min tete in kan van ttial hna lai. An ttuan kum cu an zate in kan fian thlu khawh hna lo caah, an min le khua lawng in kan van langhter hna lai.

1. Mang Thio (Saikah)
2. Tlang Iap (Saikah)
3. Thawng Kam (Ruakhua)
4. Kio Dun (Saikah)
5. Hlei Khar (Saikah)
6. Mang Kaan (Bungkhua)
7. Mang Thio (Saikah)
8. Ral Khar (Saikah)
9. Mang Uk (Thau)
10. Lei Hmung (Saikah)

A COZAH PRIMARY SIANGINN KAN HMUH KUM IN TU TIANG RIANTUANTU HNA

A cozah sianginn kan hmuh hi 1958 kum ah asi. Siang inn a cozah in kan hmuh zong in siang inn kong tuan bia zoh awk a umlo caah, sianginn ca chimtu hna kong zong hi fiang ngai in kan langhter kho lai lo. Cu caah Sianguk(saya kyi) lawng in kan van langhter hna lai. Sianginn kongah record an chiah lo caah ah kan hngalh khawh hna lo nak bik hi asi.

1. Hrang Uk 7th pass (Tikir)
2. Ngun Hmung 10th pass (Lungler)
3. Al Chum 7th pass (Bungkhua)
4. Do Thang 7th pass (Lungding)
5. Tlang To 10th pass (Lungding)
6. Ngun Mang 10th pass (Ruakhua)
7. Tlang Iap 8th pass (Saikah)
8. Za Hei 10th pas (Bungkhua)
9. That Lian 10th pass (Surngen)

Mah vial hi Sianguk rian a kan tuan piak tu kan hngalh khawh mi hna an si hna.

PRIVATE MIDDLE SIANGINN DIRHNAK

Private sianginn dirh nak kong kan tial tik ah hin Saya, Rual Cung hi Philh awk a ttha lo. Zeica kan ti ahcun amah hi Lungler Singinn ah siang ca chim a ttuan lio a si i Saikah khuami tangli sianginn a lonhmi paoh khua chung i an tlonlen lulh ha a hmuh hna, a zoh hna tikah a lung a fak tuk i private Middle sianginn dirhnak kong hi biatak tein a rak chimh hna. Sianginn a kai dingmi siangngakchia zong kha biatak tein a rak sawm hna.

Cu tikah khuami hna zong an lung a tho cio i 1974 kum, Pu Tial Vung khuabawi ttuan lio ah Private Middle sianginn cu an rak dirh. An dirh lo ah an rak ceihmi cu Saikah khua private Middle i a kaimi, Taanghra a awngmi paoh cu Loh Aa nan ipe dih lai, lahkhah zong khuami nih hi vial hin an ti ning in pek a si lai tiah biakhiahnak an rak tuah. Cu phung cu a ttha tuk tiah ruah a si  i tuchun ni tiang zulh a si. Kum 29 chung kan dirh chungah cachim rian a kan ttuanpiaktu hna nih teimaak chuah in an kan ttuanpiak caah khuami hna zong kan i lawm hringhran.