RAM UK BAWI DOHNAK

Mah lio Ram uk bawi cu Pu Lian Dun a si. A hlan Ram uk bawi nih cun sakhua rawl rel an ti i Rawl asi ahcun Relkhat, Phaisa asi ahcun Fang nga a rak laak hna. A sinain Lian Dun nihcun Fangfaak relkhat in a rak laak hna, Vok a si ahcun pahra ah pakhat a rak lak hna hlei ah sapai a rak lakchih hna. 

Cu vialte cu Thantlang ah an va ngalh tawn. Lahmum tiangin a rak kholh. Cun a Inntual a buat tikah a thlawh ah a cah hna. A inntual thlawh lio ah Ruakhua Pa nih Lian Dun bawtor Inntual tiangin thlawhter a ti, cu lio ah cun Lian Dun cu a hnulei ah a rak dir caah zei ruangah dah na ka pamh a ti i Fung in a rak tuk. Saikah Al Thang zong a rak tuk ve.

Cu tikah Saikah nih kan celh ti lo an ti i a hodah Lian Dun report ah a kal lai tiah meeting an rak tuah. Ziipeng bawi cu Tidim i a umlio a si caah Pu Hulh Ling le a hawi pa Mang Dai cu Ziipeng bawi ton ah Tidim ah an rak kal. Ziipeng bawi nih cun keimah ka rak tlun tikah nan bia kan ceihte hna lai a rak ti hna. Lian Dun nih an ka report ti a theih tikah daantatnak ah Vaar hlei khur cawh ah a rak cah hna.

An hlei khur cawhnak ahcun Lian Dun nih Rang ai ciit i a rak fuh hna. Lian Dun nih Al Thang a vun ti ahkhin Pu Khua Thawn nih Dunpi Dunte na Vazuun mei le ka lupawng ithleng usih a van ti i tuk a van timh ahkhin an tlaih hna. Lian Dun cu a kir colh ve. 

A hnu pi ahkhin Ziipeng bawi cu Dawnkhua ah a rak tlung, Ziingpeng bawi nih Saikah le Lian Dun cu bia a rak ceihpiak hna. Cu biaceihnak ahcun Lian Dun cu Saikah nih an rak tei. Cu tikah Lian Dun cu a thin a hung tuk a ka reporttu Hulh Ling ka pua seh a rak ti i Ruakhua in Saikah tiang Pu Hulh Ling a rak puak. Hulh Ling cu Pate tthawng a si Lian Dun pa nganpi a caah a puak tikah a ke vawlei a phiak i vawlei ahcun heh tiah Pu Hulh Ling nih a rawt chih i Lian Dun cu a ke zong a rak kok viar. Cu hnu cun Lian Dun ai phuah caah Lian Khar nih a rak uk hna. Chiah zong a rak khawl ti hna lo.