NGANDAM NAK

Saikah khua cu Bawi Khrih thawngttha an theih hlan le an zumh hlan ahcun, an zawtfah caan ah Leitla le Thau tlang khauchia sinah li an rak tin i a langh ning paoh in ai bawlsammi an rak si. Khuachia khuavang sin i an rak bawl tikah a dam zong an rak dam tak ve.

Jesuh khrih Thawngttha a luh hnu tiah cun sii ai in an i thlopbul cang. Siizung hmun a hlat caah mah khua mi sii thiammi hna nih rak thlopbul a si. Thlopbultu hna hi an thiam ngaingai caah khuami nih kan  ibochan ngai hna. Khua chingchan zongnih rak fuhpanh lengmangmi hna an rak si. Pu Ttial Vung le Pu Hlei Khar hi an kan thlopbul hmasatu hna an rak a si. 

An thih hnu zongah dawtu Pathian nih Sii-ai thiammi a kan pek lengmang. Pu Za Hei Pu, Tluang Uk le Saya Kyi That Lian hna zong hi an kan thlopbultu an si hna. Caan tlawmpal a rauh ah Pu Za Hei le Pu Tluang Uk nih an kan pemtak tthan i cu hnu zong ah Pathian nih Pu Za Peng a kan pek tthan.

Kan khua ah Sii bawi rian a ttuantu hna hi Pathian nih an kutke thlawchuah apek i an kut in mizaw tampi nih damnak an hmuh. Doctorte tluk in kan  ibochan mi hna an si. An caan lio cio ah Dawtnak mithmai le zaangfahnak thinlung he an kan thlopbultu an si. Sii-ai lei a kan tawlreltu tthenkhat hna nih kan kaltak cang hmanh hna sehlaw, hi ca hin upatnak kan pek hna i a kan zohkhenh liomi hna zong an cungah lunglawmhnak kan langhter. Atu ahcun a cozah in Sii sayamah zong an kan pek cang.